कालीकोटमा भीषण पहिरो, तीनको मृत्यु, चार बेपत्ता

काठमाण्डु, ७ जेठ –कालीकोटको कोटवाडा गाविसस्थित लालिघाट बजारमा बिहीबार राति भीषण पहिरो जाँदा ३ जनाको मृत्यु भएको छ भने चार जना हराइरहेका छन् । कर्णाली नदीको तिरमा रहेको लालिघाट बजारमा अविरल परेको वर्षातपछि गएको पहिराले बजारका १ सय भन्दा बढी पसल, घर टहरा पुरिएका छन् । पहिरोमा बेपत्ता भएका चार जनाको खोजी कार्य जारी छ । नेपाल प्रहरी, नेपाली सेना र सशस्त्र प्रहरीको टोलीले उनीहरुको खोजी जारी राखेको छ । पुरिएका घरका सामानहरु पनि निकाल्ने काम भइरहेको कालीकोट प्रहरीले जनाएको छ । लालिघाट बजारमा करिब १५० वटा घर छन् । ती मध्ये १ सय घर अहिले परिएका हुन् । कणाली राजमार्गबाट नजिक पर्ने लालिघाट अस्थायी प्रकृतिको बजार हो । घटनास्थलमा कालीकोटका प्रमुख जिल्ला अधिकारी प्रबिण श्रेष्ठ, नेपाल प्रहरीका डिएसपी किशनसिंह बुडाल, नेपाली सेनाका मेजर विजय थापा लगायत अधिकारीहरु पुगेका छन् । घटनास्थल पुग्न सदरमुकामदेखि एकघण्टाको गाडी यात्रासकेर आधा घण्टा पैदल हिड्नु पर्छ । भीषण पानी परेकोले उद्धारकर्मीलाई सदरमुकाम मान्माबाट घटनास्थल पुग्न समय लागेको बताइएको छ ।