लामो दाह्री विरुद्ध प्रहरीको अभियान, कलमी गरियो १३ हजार पुरुषको दाह्री

हामीकहाँ कुनैबेला प्रहरीले डन भन्दै लामो कपाल पालेका युवाहरुलाई च्याप्प समाएर कपाल काटिदिने अभियान नै चलाएको थियो । पछि निकै विवाद भएपछि त्यो रोकियो । अहिले मध्य एसियाली देश ताजकिस्तानमा भने त्यहाँको प्रहरी युवाहरुको दाह्री कलम गरिदिने र खौरिदिने अभियानमा लागेको छ । ताजकिस्तानको प्रहरीले देशका झण्डै १३ हजार पुरुषलाई समाएर उनीहरुको दाह्री काटिदिएको छ । सरकारका अनुसार इस्लामिक अतिवाद तथा बाह्य असरका विरुद्धमा राष्ट्रव्यापी अभियानका रुपमा प्रहरीले लामो दाह्री पालेका पुरुषहरुको दाह्री काटिदिने अभियान चलाएको हो । सरकारी अधिकारीहरुले महिलाहरुलाई हिजाब पहिरिन समेत रोक्ने कोसिस गरेका छन् । स्कुल तथा विश्वविद्यालयहरुमा हिजाबमाथिको प्रतिबन्धलाई थप बढाइएको छ । आफ्नो दाह्री जबरजस्ती कलमी गरेर आधा छोटो बनाइएका एक युवाले आफुलाई निकै अपमानित भएको महसुस भैरहेको र आफ्नो मजाक उडाइएजस्तो लागिरहेको बीबीसीलाई बताए । यस्तो अभियानले उल्टै अतिवादितालाई बढावा दिने उनको ठम्याइ छ । एक तथ्यांक अनुसार मध्य एसियाका विभिन्न ५ देशहरुबाट झण्डै ४ हजार मानिसहरुस्लामिक स्टेट नामक आतंकवादी समूहमा भर्ती हुन सिरिया पुगेका छन् । मुस्लिमहरुको दाह्री काट्ने अभियान चलाएको ताजकिस्तान रुसबाट स्वतन्त्र भएको २० वर्षपछि पनि गरिबी अस्थिरता तथा बेरोजगारीबाट जुधिरहेको छ ।