मोदीको विरोध गर्दै भारतमा युद्ध थाल्ने आइएसको चेतावनी

१७ मंसिर, काठमाडौं । सिरिया र इराकको केही भाग कब्जामा लिएको इस्लामिक अतिवादी संगठन ‘इस्लामिक स्टेट’ (आइएस)ले भारतीय प्रधानमन्त्री नरेन्द्र मोदीलाई ‘हिन्दु अतिवादी’को आरोप लगाएको छ । मंगलबार सार्वजनिक गरिएको आइएसको घोषणापत्रमा अबको युद्ध भारतमा केन्द्रित हुने बताइएको छ । ‘अब यो अभियान भारत, पाकिस्तान, बंगलादेश र अफगानिस्तान लगायतका मुलुकमा विस्तार हुनेछ’ आइएसको घोषणापत्रमा भनिएको छ । घोषणापत्रमा भारतको राजनीतिक अवस्थाको विश्लेषण गर्दै भारतीय प्रधानमन्त्री नरेन्द्र मोदीलाई अतिवादीको संज्ञा दिइएको छ । मोदीलाई उसले हतियारको पूजा गर्ने दक्षिणपन्थी हिन्दु राष्ट्रवादी भएको विश्लेषण गरेको छ । ‘भारतमा हिन्दुहरुको गतिविधि निकै बढेको छ, जसले गाई खाएको अभियोगमा मुस्लिमहरुलाई मारिरहेका छन्’ आइएसको घोषणापत्रमा भनिएको छ । भारतमा मुस्लिममाथि ज्यादती भएका कारण त्यहाँ आइएसको गतिविधि बढाउनुपरेको घोषणापत्रमा बताइएको छ । आगामी दिनमा हरेक देशमा आइएसले युद्ध गर्ने भन्दै उसले विश्वभर रहेका डेढ अर्ब मुस्लिमलाई आफ्नो शक्तिका रुपमा ब्याख्या गरेको छ ।