पाकिस्तान विस्फोटमा मर्नेको संख्या ६९ पुग्यो, ३ सय भन्दा बढी घाइते

१५ चैत, काठमाडौं । पाकिस्तानको लाहोरमा भएको बम विस्फोटमा मर्नेको संख्या ६९ जना पुगेको छ । पंजाब सरकारका स्वास्थ्य सल्लाहकारका अनुसार ३ सय भन्दा धेरैको शेख जैद तथा जिन्ना अस्पतालमा उपचार भइरहेको जानकारी दिएका छन् । उनले रक्तदान गर्न सवैमा आग्रह गरेका छन् । मृत्यु हुनेमा महिला र बालबालिकाको संख्या धेरै छ । विस्फोट गुलशन पार्कको गेट नजिक भएको थियो । शहरको बीचमा रहेको उक्त पार्कमा विदाको दिन मानिसहरुको बाक्लो उपस्थिति हुने गरेको छ । प्रहरीले आत्मघाती विस्फोटमा ७ देखि १० किलो विसफोटक पदार्थ प्रयोग गरिएको अनुमान गरेको छ । विद्रोही समूह तालिवानको पाकिस्तानी समूहले आक्रमणको जिम्मेवारी लिएको छ ।