नीलगाई मार्ने ५ जना घटनास्थलबाटै रंगेहात पक्राउ

कपिलवस्तु–संरक्षित दुर्लभ वन्यजन्तु निलगाई मारेका ५ जना सिकारीलाई प्रहरीले घटनास्थलबाटै रंगेहात पक्राउ गरेको छ ।

प्रहरीले मृत नीलगाईसहित पक्राउ गरेका ५ जना सिकारीहरु जिल्लाको शिवराज नगरपालिका–१३ जुम्ली भन्ने स्थानमा निलगाई मार्ने क्रममा उनीहरु पक्राउ परेका हुन् । विशेष सुराकीका आधारमा इलाका प्रहरी कार्यालय बहादुरगञ्जका प्रहरी नायब निरीक्षक भिमसेन विष्ट नेतृत्वको टोलीले घाइते अवस्थाको निलगाई, प्रयोग गरिएको हतियारसहित पक्राउ गरेको हो । पक्राउ पर्नेमा शिवराज नगरपालिका–१२ पकडीका ४६ वर्षीय संसाद भाट, २६ वर्षीय सब्बीर बढई, वर्ष २६ का आरियाओन मुसलमान, वर्ष २६ का पप्पु बढई र २० वर्षीय जुबेर बढई रहेका छन् । पक्राउ परेका पाँचै जनालाई आवश्यक कारवाहीका लागि जर्लैया सेक्टर वन कार्यालयको जिम्मा लगाइएको प्रहरी नायब निरीक्षक विष्टले जानकारी दिए । निलगाई, हतियार सहित पाँचै जनालाई अनुसन्धानका लागि अहिले चन्द्रौटास्थित जर्लैया सेक्टर वन कार्यालयमा राखिएको छ । निलगाई मार्ने पाँचै जनालाई राष्ट्रिय निकुञ्ज तथा वन्यजन्तु आरक्षण ऐन नियम बमोजिम कारवाही गरिने सेक्टर प्रमुख अमरकान्त झाले जानकारी दिए ।